म छोरी,
समाजका लागि अबलाकी पात्र
शत्रुका लागि विचरी,
कामका लागि कमजोर
पैसाका लागि भरोसावादी
ईज्जतका लागि जोखिम

र पनि,
म भित्र आशा छ
घरको चुहिएको छाना टाल्ने आशा,
आमाका ओठमा मुस्कान फुलाउने
बाको मुहार उज्यालो बनाउने आशा

म गन्हाउने सोच भएका गुन्डाहरुकी माल,
रन्डाहरुका लागि वेश्या
र बलात्कारीका लागि मिठो फल
भमराका लागि फूल पनि हुँला

तर पनि मेरो एक सपना छ
मेरो नामले कसैको पनि ईज्जतमा
अलिकति पनि दाग नलगाउने सपना

म भाइका लागि एक कमजोर युवती
प्रेमीका लागि उसको जिम्मेवारी
बाबाका लागि दायित्व र
आमाका लागि अर्काको घरमा जाने जात

र पनि मेरो ईच्छा छ
सबैले खुसी पाएको हेर्ने

हो, म छोरी हुँ
सपना देख्न पाउँछु तर पूरा गर्न पाउदिनँ
म लक्ष्य बनाउन सक्छु तर सफलता पाउन सक्दिनँ

आखिर किन कर्म र प्रयास गर्न दिइँदैन ?
र भाग्यको भरोसामा दुःख खेपाइन्छ
छोरीहरुलाई मात्र ?