न्यायाधीश तिमी बन्छौ,
आफ्नो धारणा तिमी पोख्छौ,
तर मलाई फरक पर्दैन नि !
तिमीले सोधिराख्नु पनि नपर्ला,
करोडौंमा एक यो ‘सुमित्रा’ कस्ती छ ?

म स्वयम्लाई थाहा छ,
समाजमा चर्चामा आएकी मात्र हुँ
यथार्थमा यो ‘सुमित्रा’ साह्रै सस्ती छ !

मेरो जीवनले ‘म’मा परिवर्तन माग्यो,
जब बदलेँ, आफूलाई नमेटिने दाग लाग्यो,
तर मलाई मतलब हुँदैन नि !

सायद तिमीले फुकिराख्न नपर्ला,
तिमीभन्दा फरक यो सुमित्राको गृहस्थी छ !
सबैको नजरमा बिझाएकी मात्र हुँ
तर यथार्थमा यो ‘सुमित्रा’ साह्रै सस्ती छ !

तिमी मलाई आफूसँग तुलना गर्दै, गर्छौ आलोचना
अनि म आफैँलाई केवल आफैँसँग मात्र गर्छु तुलना,
तर मलाई दुःख लाग्दैन नि !

तिमीले सुनाइराख्नु नपर्ला,
हो यो ‘सुमित्रा’ जबर्जस्त छे !
समाज बदल्ने सोचमा हिँडेकी मात्र हुँ,
यथार्थमा यो ‘सुमित्रा’ साह्रै सस्ती छ !

मैले कहिल्यै सुनाउन चाहिनँ,
किनकि बिराना कसैले सुन्ने नै थिएनन्
निर्दोष छु भनी जताउन चाहिनँ,
किनकि आफ्ना भए मिथ्या आरोप लगाउने नै थिएनन् !

पाएँ चरित्रहीनको ट्याग !

के तिमीले म हिँडेको बाटो हिँड्यौ र?
के तिमीले मेरा उतारचढाव भोग्यौ र ?

१ रुपैयाँको सिक्कामा सन्तुष्ट हुँदै ,
म आफैँसँग मुस्कुराएकी छु
अनि,
अलि बेग्लै पहिचान बनाउने गन्तव्य बोकी,
खाली गोडा दुखाएकी पनि छु !

जे जति छ मभित्र नै छ नि,
न तिमीलाई आफ्ना कुरा सुनाएकी छु
लाग्छ अब तिमीले सोचिरहनु नपर्ला,
तिम्रा सोचमा नै नअटाउने यो ‘सुमित्रा’ कस्ती छ ?

कायर हैन नि, मौन मात्र छु म अहिले !!!
किनकि सबैले पचाउन नसकेको मात्र हो,
यथार्थमा यो ‘सुमित्रा’ साह्रै सस्ती छ !