बैतडी । बैतडीको पाटन नगरपालिका–९ स्थित ज्ञानेश्वर नमुना माध्यमिक विद्यालयका एक शिक्षक र विद्यार्थीमा कोरोना संक्रमण देखिएको छ।

गत साता एक विद्यार्थी र एक शिक्षकमा कोरोना देखिएपछि उनीहरूको कन्ट्याक्ट ट्रेसिङ गर्दा १२ वर्षीया छात्रामा कोरोना पुष्टि भएको हो। यससँगै उक्त विद्यालयमा एक शिक्षक र दुई विद्यार्थीमा संक्रमण देखिइसकेको छ।

पाटन नगरपालिकाका स्वास्थ्य शाखा प्रमुख मदनसिंह महराका अनुसार संक्रमण पुष्टि भएका शिक्षक र विद्यार्थी होम आइसोलेसनमा बसिरहेका छन्। उनले भने, ‘संक्रमितको स्वास्थ्य अवस्था जटिल छैन, उनीहरू सबै होम आइसोलेसनमा बसिरहेका छन् ।’

संक्रमण देखिएपछि अन्य शिक्षक र विद्यार्थीको पनि पीसीआर परीक्षणका लागि स्वाब संकलन गरिएको छ। कन्ट्याक्ट ट्रेसिङका आधारमा १०६ जनाको स्वाब संकलन गरिएकामा ७५ जनाको रिपोर्ट आएको छ।